سلام اعلى النجف والحضرة والراية = وعلى المدفون بيهه المعجزه الآيه سلام اعلى النجف من ديرة الاجناب = على ارض الغري وذاك داحي الباب سلام إمطرز ابدمعات لو تنساب = ابد ماتنگطع كل يوم جرايّه سلام اعلى النجف والحضره والرايه جرايّه الدموع اتسيل عالخدين = تواسي البطل حيدر سيد الكونين تگله المحن هالتلفيك گلي امنين = يحماي الدخيل اتريد حمايّه؟؟؟ سلام اعلى النجف والحضره والرايه يحمّاي الدخيل اتلوذ بيك الناس = من جور الزمان وقسوة الارجاس يمقياس العداله ابحضرتك تنقاس = اجينه اهموم كلنه وإلك شچّايه سلام اعلى النجف والحضره والرايه شچّايه اجينه ونجذب العبره = تعنيناك كلنه وبالگلب جمره نحبّك ياعلي وتدرينه عالفطره = يامن حبّك املنه واسمى كل غايه سلام اعلى النجف والحضره والرايه عالفطره نحبّك يوم چنّه ازغار = وكل واحد حفظ لك بالگلب تذكار ومانتخلّه عنك ابد مهما صار = يظل نهجك نهجنه وبيه مشّايه سلام اعلى النجف والحضره والرايه مانتخلّه عنك لو دركنه الموت = يامن باسمك نجه يونس ابطن الحوت ابعزمك مانهاب وعالمنايه انفوت = نفديلك عمرنه ونظل وفايه سلام اعلى النجف والحضره والرايه نفديلك عمرنه وهذا اقل مجهود = يمن عمرك فنيته ابساحة المعبود وإلك منه عهد وللقائم الموعود = يظل نهج الامامه ونظل ودايّه سلام اعلى النجف والحضره والرايه ودايه نظل العمر مهما طال = جيل ابجيل سرنه وثبت هذا الحال لا غرتنّه دنيه ولاتهزنه اهوال = سرنه اعلى الدرب كل يوم عنايّه سلام اعلى النجف والحضره والرايه لا غرتنّه دنيه ولا جزعنه ابيوم = او واحدنه اعلى حبكم بالزغر مفطوم اشگد جار الزمان ومضتْ بينه اهموم = لچن حبكم يظل لذخر والصايه سلام اعلى النجف والحضره والرايه ذخر حبكم يظل ونشيل بيه الراس = تباهينه ابوصلكم بين كل هالناس علي تاج الولايه ومعدن النوماس = حبكم كسب رابح فاز شرايّه سلام اعلى النجف والحضره والرايه حبكم كسب ندري واليحب ربحان = اليحبكم دوم ناجي وابد ماخسران يا مرجع كل رساله ومهبط القرآن = سلم كلمن نخاكم جينه نخايّه سلام اعلى النجف والحضره والرايه نخايّه اجينه وبينه تسعر نار= وقصدنه ازيارتك ياحيدر الكرار لچن وسفه لگينه امطوقيك اشرار = اليطب لك والطلع مخطور للغايه سلام اعلى النجف والحضره والرايه ابو الحسنين حيف امطوقيك اصلاف = لامن قيم عدهم لا عدل وانصاف شنسميهم همج اوباش لو اجلاف = قليله التسميات ابحقهم اهوايه سلام اعلى النجف والحضره والرايه ابو الحسنين نورك ما تحجبه اغيوم = اسد ضرغام سيف وناصر المظلوم وتظل ارواحنه بالحضره دوم اتحوم = نذر ارواحنه الحضرتك فدايّه سلام اعلى النجف والحضره والرايه نذر ارواحنه الحامي الحمه المهيوب = علي حبك نجاة وغاية المطلوب علي ابنهجك نسير ونفتخر ونذوب = يالنهجك ذخرنه اهناك تچّايه سلام اعلى النجف والحضره والرايه حبك حصن من نار الحطيم اهناك = فاز السلك نهجك ياعلي او والاك دنيه وآخره ماشين كلنه اوياك = ابخطك نلتزم يالخطك امرايه سلام اعلى النجف والحضره والرايه = وعلى المدفون بيهه المعجزه الآيه