(موشح) دار غربة لا خيم ولا والي=ومثل حال حسين أصبح حالي حين اصاويب ابوالسجاد انزفت=واعتنت للعايله الخيل ولفت اطلعت زينب بين الاجساد اهتفت=بالغرب تاهت يخويه عيالي جيت أناحط انحب واصيح=وين يا من طحت امصرع جريح مثل دمك مدمع ايتامك يسيح=وآنه عين المحن تتربالي گوم واحمي الحرم يا والي الحرم=گلبي من بعدك ابنارين انضرم نار من الضمه ونار امن الخيم=مو صخر دم ولحم دلالي گوم رد الخيل يمروّع الخيل=وادرك اعيالك يبن حامي الدخيل هذا ليل وتدري من يوحش الليل=اشراح اشوف بعيني واشيجرالي راح خدري اوياك يا مظلوم راح=من طحت سور الحرم وياك طاح مثل دمك دمعي من العين ساح=ورخص يا مظلوم دمعي الغالي گوم داوي الروح يا سلوة الروح=جروحي وجروحك صفت نفس الجروح ترضه للشامات مسبيه أروح=وراسك ابراس القنا اگبالي اشصار بيه شصار ما تعلم شصار=انهار ليل انحب وحن ليل ونهار واليسر يكلف يبن حامي الجار=للأجل اشباح تتراوالي الظعن هذا الظعن يا حامي الظعن=والحرم متولمه لخوض المحن صدري بالآلام يبن امي انشحن=والمصايب غدت تتصدالي بين وادي الموت أصحه وأنتبه=امد وهنه لفرگاك والطم عالوجه حايره وما أدري لاوين اتجه=الموت ارومه وانته تحيا ابدالي (بغداد 1975م)