اتفرّس ابعيني سهم أحزاني= بويه جيتك أشتكي أشجاني * * * جيتك و روحي ابحزنها امحمِّله=بضعتك آذوها يا سيْد الملَه من رحِت وادموعي عالخد هامله=جمره تسعر تحرگ ابأجفاني * * * يا رسول الباري أشكيلك إجيت=بعد عينك أخبِرك بويه اشلگيت ما شفِت راحه أبد بالهم بگيت=و عمري منّ الحزِن خلَّص فاني * * * بس رحِت جتني الِّي تتسمّه الصِحاب=ابلا ذِمَم ﻻ غِيره و انگلبَوا اذياب اقتحمَوا البيت و خذَوا داحي الباب=و آنه منّ العَصره طِحْت امكاني * * * لذِت خلف الباب و اعليّه انضغَط=طحِت و المحسن على العتبه سگط اسألِت ربِّي اينزِّل اعليها السخَط=و يقصُف ابعمْر الذي اذّاني * * * رحِت للمسجد ابهمِّي غاضبه=ابكسر ضلعي و نار گلبي الّلاهبه اوگفِت للنقضَت عهَدها امعاتِبه=و اكشِفَتهُم حُجّتي و تبياني * * * نسوا بيعة حيدره و يومه انكروه=و عوَض ما ايطيعونه للبيعه اسحِبوه و ورثي منّك بالغصُب منِّي خذوه=الخذه امكانك عنِّي مو مِتواني * * * ما اتوانه ابظلمي و اشتد الحقِد=و آنه گلبي اعله الشدايد ظَل جَلِد اتوسّلِت ربّي أريدن أنلِحِد=و لا تظل روحي ابألمها اتعاني * * * ثاكله مثلي فلا يحصل أبَد=استارثتني زينب و شافت أشَد ابصدْر اخوها الشمِر متربّع گعَد=يُمّه صاحَت دهري اشراواني * * * شفْت اخوي احسين حزّة منحره=و جثّته ابطعن و طبُر متوذِّره اضلوعه كلها ابخيل منّه امكسّره و مثله رضّوا يُمّه كل اخواني * * * هم وصلَّچ خبر بالعيله انسبَت=و زينب اوياهم أسيره من مشَت امتوني مثلِچ بالسياط اتورّمت=زجر يضرب بيّه و اتولّاني * * * رضا عبدالعزيز