بالسما هزّ العرش صوت الأمين=جعفر الصادق گضى ابسمّ اللعين
بحر لعلوم الحوى كل معرفه=وارث الحيدر اوجدّه المصطفى
نوره الضوّى الفلك وسفه انطفى=كل فرد منا صبح بعده حزين
كل فرد يلطم على صدره ويون=يندب اويهتف شعاري هالحزن
ما أظن تلفي السعادة ما أظن=من بعد عزنا سليل الطاهرين
اتهدّمت من عگب عيناه الصروح=والملائك تندبه وتبچي وتنوح
في البقيع ابهالمسا الگبره تروح=لو تراهم بالبواچي لاطمين
اتزلزلت سبع الأراضي والسما=وشيعته تبچي اودمع منها همى
على الصادق حگها لو تبچي دِما=هذا بن باقر علوم العارفين
هذا بن طه النبي الهادي الرسول=هذا بن حيدر علي وابن البتول
حبّه نابت في الگلب لا ما يزول=شيعة نبگى عالولاية ثابتين
كل سنة ننصب عزا ونلطم صدور=وننشد الغايب عسى يظهر يثور
من السمّوا جدّه والهدموا الگبور=والدمع سيّال من كل محجرين
يا ولينا جدّك الصادق گضى=وانسحب مظلوم مثْل المرتضى
ضاگت الدنيا علينا والفضا=اتهدّم الگبْر وصبحنا ميتين
صعب ما نگدر نشوفه ابهالوضع=غصب من كل عين يجري هالدمع
سيدي يمتي الظلامة ترتفع=تنتقم من كل عداك الناصبين
يا رجانا يمتى تظهر يالولي=ينسحگ كل ضيم والحگ يعتلي
الگلب لفراگك يا غايب يصطلي=ريت يالغالي نشوفك ناصرين