عــــدد الأبـيـات
23
عدد المشاهدات
2191
تاريخ الإضافة
06/09/2010
وقـــت الإضــافــة
8:30 مساءً
(1423 ه) هيثم سعود الكربلائي
شِدّ يجاسم عالحرب يوليدي شِد=واخذ گلبي اوياك بيه اسهام صِدّ
اخذ گلبي وياك طب بي للحرب=وچالدرع خلي الگلب فوگ الگلب
اطعن اضرب يبني واوجع بالضرب=وبرگاب اعداك حِدّ السيف حِدّ
حِدّه بيها وحزّ رؤوس الظالمه=وخلي سيفك يحصد ابلا مرحمه
ذوله زمرة اصل محنة فاطمه=عِدّ مصايبها بعدد هالروس عِد
عِدّ يجاسم واحصد بروس الجمع=وكل خصم راسه العفن من ينگطع
كبّر وصيح اءنجبر كسر الضلع=لو بعد يا فاطمه أَطرح وأَمد
يبني جندلها العِده ولا تستكين=اضرب اطعن عاليسار وعاليمين
للجنين اشلون سگّطوه للجنين=اشسوّه محسن واصبحتله الگوم نِد
تنجرح عوف الجرح لتضمّده=انسه جرحك وانته مابين العده
اذكر الغدرته الگوم ابمسجده=جدّك الكرّار يبني شلون جِدّ
جدّك الكرّار اءذكره المرتضه=المارضه بغير الله حاكم ما رضه
او رفض كل اهل الدعاوي المغرضه=وصارت الاشرار كلها اعليه ضِدّ
شد يجاسم عالحرب عوف العرس=لا تخلّي الظالم ايشوف الشمس
والدك من گبره يهمسلك همس=سِدّ يجاسم خِلّة المسموم سِدّ
يبني من گبره يناديك الحسن=هذا يومك وانته بيديك الرسن
اسلب ارواح العده احرمها الوسن=او صد عليّه لو لفاك الاجل صِد
صد عليه لو گرب ليك الاجل=يبني واتعنّاك للحومه بعجل
وارد اگلّه الخالقي عزّ وجل‌ّ=زِد عليّه بالصبر يا ربي زد
يبني واگعد يمّك بگلبي الجريح=والطم اعله الراس ودموعي تصيح
گلبي طايح هذا لو جسمك طريح=شدّ يخيط الدمع جرح اوليدي شِدّ
يا جرح دمعي اليطيبه يا جرح=چنت اظن مجروح يبني ومنطرح
ما دريت بيوم عرسك تنذبح=رد عليّه رويحتي يوليدي رِد