حلم وسنين ﭼنت اترجى واتمنى=أجي لدارك إمامي ويَمَّك اتعنى حلم غافي يداعب جفني السهران=ولا لَحظه شِبَع جفن السهر مِنَّه عَن الجنه ﭼِنت أسأل دربها منين=ﮔالوا روح مَشْهَد وانظُر الجنه إجيت لْمَرْقَدَك ياجنة الفردوس=دموعي تلطُم على خدودي بالحَنَّه ﮔِصَدتَك ياغريب من البُعُد مشتاﮒ=وﮔبل ما أَوْصَلَك وصْلَتَّك الونَّه إجيت مْحَمِّل اجبال الشكايه وياي=ثجيل الهَم عِماني وللظهَر حنَّه يباب الله الﭽبير لبيه تلوذ الناس=يَمَن فن العطايا والكرم فنَّه إجيتك يالرضا يلما ترد محتاج=ﮔلُب جيتك ولاظن ينﮕطع ظنَّه إجيت اهديك روحي ياحبيب الروح=يمن إسمك شفاء العله والونَّه شفيت بفضلك ونلت الشفا بذكراك=ليندبك تبعد اصناف العِلَلْ عنَّه أوج لك بالدِلِيل شْموع لِمْعَرْسين=أزف ﮔلبي لْحَضِرْتَك رايد اتهنَّه وحروف اسمك قصيده وﮔلبي عالضلعين=عِزَف بالحُب لحنها وبيها يتغنَّه