أنا معذور حوار بين الإمام علي و العباس (ع) للشاعر: علي إبراهيم الكرّاني الإمام علي (ع) ابزينب مهجة الزهرا=وصيتك يا گمر عدنان وما ظنيت تتركها=أسيرة ابولية العدوان تذكر يوم اسايلها=وعلى خدها الدمع سايل؟ من اخوانچ من اتريدين=تختارين الچ كافل؟ گالت لي بيو الحسنين=گلبي اختار ابو فاضل غيور اوليدك العباس=وبحمايته ما بنهان زينب كانت ابظلّي=ظلها ماحد ايشوفه وتاليها بدون اخمار=تطب الشام والكوفة عن احمايتها سيفك وين=وصولاتك المعروفة؟! رضيت الشمر يشتمها=ويضربها زجر وسنان؟! على اختك چيفة ترضاها=تتفرّج جميع الناس؟! وبمجلس يزيد اشلون=تدخل حسرة يا عباس؟! وتالي اتشوف راس حسين=منه امكسّرة الأضراس وتتروع يتاماها=ابغربة وتبچي النسوان العباس (ع) يبويه لا اتعاتبني=ترى ما أحتمل لعتاب وعاين عيني وچفوفي=الگطيعة وراسي المنصاب أنا معذور يابويه=ورغم العذر گلبي ذاب وراسك لوسلم راسي=فنيت الجيش بالميدان أختي يوم أنا موجود=ماحد هتك ليها دار ولا خدها انلطم صوبي=ولا ضلّت بدون اخمار ولا حد كسر منها اضلوع=ونبّت بالصدر مسمار ولا نخّتني واتوانيت=أبد يا فارس الفرسان الإمام علي (ع) يولدي لا اتآذني=ابذكر امصيبة ام حسين مو هينة على گلبي=أشوف اللطمة فوگ العين ولو ما گيّدت عزمي=وصيّة سيّد الكونين نفخت الصور من غيضي=وفنيت الإنس ويّا الجان العباس (ع) أنا معذور في أمري=وانته يالأبو معذور ومصايب فاطمة الزهرة=لگتها زينب ابعاشور وكل اللي لگاه حسين=من ضلع امه المكسور والله بعصرة الزهرة=لحسين انذبح عطشان الإمام علي (ع) عتبت اعليك من كثرة=حبي لك يراعي الزود وعلى گلبي اشكثر صعبة=منّك تنگطع لزنود؟ ويوگع سهم بعيونك=وراسك ينفضخ بعمود وگصدي يبني من لعتاب=ابصدري تخمد النيران وعتابي عن أخوك حسين=مهو ابتگطيع أوصاله ولا عن سهم في گلبه=ابگوة امن الظهر شاله لكن چيفة خليته=يدوسه الشمر بنعاله؟! ويفصل راسه عن جسمه=ويظل فوگ الترب عريان؟! العباس (ع) لولا گطعت اچفوفي=وسهم عيني وضرب الهام فاضت كربلا ابلدموم=وصارت زلزلة بالشام ولا داس الشمر لحسين=بنعال وحرگ لخيام ولا هانت علي زينب=تصير ابولية العدوان