اشعملت بعدك هاي الأمه=صارت ضدك هاي الأمه نشرح وانعدد أدوار=ريتك حاضر يالمختار امتك يا سيد الرسل=چان المجد يرعاها شرفها ربها اعله الأمم=وتاج الكرامه انطاها هالأمه ليش اتغيرت=نسأل نگول اشجاها وليش المياه الصافيه=سارت عكس مجراها المن طاعت هاي الأمه=عگبك ضاعت هاي الأمه نحچي ونكشف كلما صار=ريتك حاضر يالمختار من الفتن للأمه چنت=تحرسها واتحاميها عگبك وسافه اتغيرت=هالأمه يا هاديها طوِّحت بظعون الجهل=صار الظلم حاديها وين الوصايه ابعترتك=يا ما چنت توصيها وسفه انخدعت هاي الأمه للذل ركعت هاي الأمه تبعت خطوات الأشرار=ريتك حاضر يالمختار عگبك اشعملت امتك=للوضع ريت اتنظره بغيبتك يا سيد الأمم=ما رعوا حگ العتره أول جريمه الي بدت=هشموا ضلع الزهره وغصبوا فدك من فاطمه=وظلت تعيش ابحسره إگعد واسأل هاي الأمه=منهو البدَّل هاي الأمه والزهره تصيح بأعبار=ريتك حاضر يالمختار من بعد محنة فاطمه=وكسر الضلع ومصابه النوب ابتدت ضد الوصي=اتوجر لهيب اصوابه دفعت ابن ملجم إله=وصوب علي ابمحرابه وادم الخانت بالنبي=للوصي اشلون اتهابه شنهو الغيَّر هاي الأمه=خانت حيدر هاي الأمه وحين اتصوب حامي الجار=ريتك حاضر يالمختار ثالث مصيبه اعله الحسن=لو بالجبل يتصدع من الامه ظل يحمل غصص=أيوب منهن يجزع وبلا ذنب يالمصطفه=مسموم چبده اتگطع صوبوا نعشه بالنبل=والكون يجري المدمع اليوم انعاتب هاي الأمه=نريد انحاسب هاي الأمه ونصيح بدمع الأنظار=ريتك حاضر يالمختار يالمصطفه وثالث حدث=لو ردت تنشد عنه لريحانتك بعثوا كتب=للبيعه رادوا منه لمن تمنعه لكربله=سيد شباب الجنه شاف الجموع امحشده=ابنبرة حرب تتغنه انجمعت بالطف هاي الأمه=ما تتوصف هاي الأمه واتحشد عسكر جرّار=ريتك حاضر يالمختار يا ريت حاضر يالنبي=وسبطك تشاهد حاله خلوه وحده بكربله=وذبَّحوا كل ارجاله هالگوم گطعوا منحره=واتسلبت أطفاله ريتك تشوف اعله الحرم=من هجمت الخياله لمن هجمت هاي الأمه=چنها انتقمت هاي الأمه بوسط خيامك تلهب نار=ريتك حاضر يالمختار (مانچستر 1994م)