الجواد وعمه علي بن جعفر هيّجت لوعاتي يَبن خير البريّه=قلّي على من آمرت تنصب عزيّه يَبني مصايبنا عظيمه اتشيّب الشّاب=نبجي على ضلعين مكسوره ورا الباب لو للجنين اللّي تعفّر فوق لعتاب=لو قود جدنا اللّي دهانا بكل رزيّه لو ضربة المحراب نبجي ياضيا العين=لو لجل عمنا الحسن لو نبجي على حسين لو للاجساد اللّي بقت من غير تجفين=لو للحريم اللّي تسمّت خارجيّه ننصب الماتم ما تقلّي اليا فجيعه=للّي انذبح ظامي على صدره رضيعه لو للإمام اللّي نشر مذهب الشّيعه=جعفر من المنصور قاسى كل بليّه ما تنحصى يبني مصايبنا ابتعداد=الله يما سجون امتلت شبّان واولاد بالأمس أخيّي ظل رميّه بجسر بغداد=بين الأعادي اجنازته ظلّت رميّه لو نبجي يبني للّذي ماتوا بلحْبوس=ماتوا ولا بين الملا الها امعيَّنه ارموس يانور عيني لو لفا لك خبر من طوس=ليْكون ابوك انصاب بانياب المنيّه حنّ وجذب حسره وزفر زفره شديده=و قلّه يعمّي حلّت مصيبه جديده ويّا الرّضا المأمون سواها مكيده=قطّع مهجته و زلزل السّبع العليّه مسموم مات ابدار غربه ماحضرتوه=يا ليتكم يَولاد ابو طالب نظرتوه وياليت شلتوا جنازته وقبره حفرتوه=مَحْلى الأهل حول النّعش تمشي سويّه قلّه العمر كلما امتد كثرت اجراحي=و الدّهر فرّق عزوتي بكل النّواحي و ظلّيت مثل الطّير متكسّر جناحي=شلّي بحياتي ضاقت الدّنيا عليّه