فقرة المصرع :

أختصر كل الحدث و أستعجِل الظهيره
كل شي صار بكربله وامن الصبح كسيره
واندفن وجه النهر والكل جَمَد في حِيره

مات كل شي و رحل إلاّ الحُسين و حُبّه
مات حتى الوكِت واللحظه نار و غُربه
مات إسم الأمل والعيشه صارت صعبه
مات نبض الشمس واحسين يوزع قلبه

ما أحچي عن رمية حجر
دم السما منها انفجر
مَر وخلص هالمشهد
ما أحچي عن ذاك السهم
لو صورته الصوره الأهم
طاح وتعب و اتوسّد

كل الصور أطويها .. خل الزمن يرويها
صوره وحيده اللي تظل أوگف عليها بحسره
صورة جسد عالغبره .. صورة جرح ما يبره
سكته ومحد حرّك رمش والكل يشد النظره

آه هذا الحُسين .. مرمي على الترايب
آه هذا الشمر .. بالناب و بالمخالب
آه هذا الحُسين .. عطشان و جسمه ذايب
آه هذا الشمر .. بيه الحقد لواهب

صوره بس حين التمر .. يتحوّل العالم جمر
الحُسين اعلى الثرى .. صاعد على صدره الشمر
ما صعد حافي بعد .. بنعاله جالس عالصدر
وجهه في وجهه اشيريد .. ياربي ياربي الصبر

طوّل جلوسه اعلى الصدر .. واحسين يناظر للخدر
وش ناوي تفعل يا شمر
ما تستحي من الله
إتخيّل انعاله استقر .. يم رقبته صوب النحر
يتخطى ويخلي أثر
يالواطي راقب الله

قبض الشيبه و بقى يحز بمنحره
مشى سيفه اعلى النحر أْو ظل يهبّره

ناحت الأكوان .. والدهر خجلان .. والأرض ماجت .. والسما حمره
يا شمر حزّيت .. منحره و خليت .. كل نبي و مرسول .. منقطع نحره

كافر .. يا شمر كافر .. مجرم و فاجر .. فعلتك شنيعه
ظالم .. يا شمر واهم .. سيفك النادم .. يذبح الشريعه

يا شمر لا .. تطلب نعيم و راحه
ما بيها فوز و مغنم
يا شمر لا .. تمشي علي جراحه
و المُستقر جهنم

والحُسين و نحره يتملك المشاعر
ينكتب خلوده ويصبح من الشعاير
والمجِد نصيبه وايامه كلها عاشر
تتبعه بدماها للمحشر المناحر

مظلوم .. مظلوم
يعيش بكل قلب ثابت هيامه
محروم .. محروم
يظل اسمه مُخلد للقيامه

إخسأ يا شمر .. ما دست الصدر
وانته ال داستك أقدام الليالي
واجزِم لك جَزِم .. سيفك منهزم
واحسين انتصر نحره وما يبالي