يِعَرفُون الشِّعِر : قَافِيَة وچَم صُورَه=مِشَاعِر لِلعِشِق والعَبرَة مَسطُورَه هَذَا الّلي نِشُوفَه يِحچِي مَأسَاتَه=وهَذَا العَاشِق الوَلهَان دستُورَه وَاحِد يِبچِي عَالأَطلَال و ينَادي=عَبلَه، ولَيلَى قَالَوا عَنهَا اُسطُورَه غِدَو بِالشِّعِر وَاحِد يِندِب الثَّانِي=وعَلَى قلُوب المِشَاعِر حَسرَة مَجرُوره حِزِن وآلَام نِتجَت شَاعِر اِيوَاسِي=مُعَانَاتَه اُو يِنقِلهَا اِبلَهَب فُورَه عَلَى اليِسمَع حَچِيهُم رَادَوا يأثرُون=يِرِيدُون اِبحَچَيهُم عَبرَه مَجمُوره خِلَص مِن الشِّعِر مَا ظَل مَشَاعِر بِي=كَأَنَّه شَجَر بَس تَالِف مِن اِبذُوره أَرِيد أَرجَع وأَرَجِّع لِلشِّعِر دَربَه=اِبطَرِيق الدِّين لَازِم يِحيَى وبنُورَه إِجِيت أَرد أكتِب وشِفت القَلم مِحتَار=وَصُف عَاجِز يِعبُّر عَن عَلِي ودُورَه يِگِلِّي اِشلُون تُوصِف مَن خُلِق مِن نُور=مُو هِيَّه الوَصَافَه اِبأِسمَه مَحظُورَه !! مَوَاقِف خَالِدَة نِذكُرهَا ونسَايِل=لِمَاذَا البَارِي خَصّ الهَادِي بِحضُورَه ؟ اِبوَسَط هَذَا الغَدِير المُصطَفَى أَعلَن=أَمُر رَبّ الجَلَالَة وعرَض مَأمُورَه عَلِي أَوَّل خَلِيفَه مِن بَعَد أَحمَد=وعَلِي اِبأَنوَارَه هَالأَكوَان مَفخُورَه إِجَى أَمرَ الله بَعد الهَادِي ونُصِّب=عَلِي حُجَّة، وشَاف النَّاس مَسرُورَه لَچَن قِسمِين مِن هَذَا الجَمِع صَارَوا=نِشُوف اِشلُون هَاي القِسمَة مَحصُوره ؟ بَعَضهُم وَي عَلِي ويِتبَع أَمُر الله=وهَاي الوَادِم ال بِالجَنَّة مَحشُورَه وقِسِم يغدُر وينكُر هَذَا أمر الله=وهَذَا القِسِم عَن جَنَّاتَه مَدحُورَه التِبَع قَالِع حُصُون الشِّرِك والمُنكَر=فَاز ومِن عَلِي يِتجَلَّى كَافُورَه عَلِي سِيف الله بِيمِين النَّبِي وَاقِف=تِرَك لِلدِّنيَا بَصمَة فُوز مَحفُورَه الشَّمِس رَدّت، وهَذِي الدِّنيَا مَالِكهَا=إِلَك يَا بَو الحَسَن تِتجَلّى مَعمُورَه بِيِمِينَك مِن قِلَعت البَاب يَا حِيدَر=شِفِت أَهل الظَلَالَه بدَهشَه مَسحُورَه تِشُوفَك يَا عَلِي وعرفِتَك ذَاك الحِين=بفضِل شَأنَك نشُوف القُوم مَقْهُورَه أُحُد والخَنّدَق أَدوَارَك يَدَاحِي البَاب=چَانَت كِلهَا بِالفَقَّار مَقرُورَه مِنُو مِثلَك يَحِيدَر طِبعَه بِالأَكوَان=يِظِلمُونَه ويِرُوح الظَالِمَه يزُورَه عَلِي مِن اِسمَه الله سَطَّر الدِّنيَا=عَلِي مِن اِسمَه هَذَا الكُون شَع نُورَه عَلِي مَذكُور بِالتَورَاة و الإِنجِيل=عَلِي دَاوود طُبعَه اِبوَسَط زَبُورَه عَلِي قُرآن رَبنَا النَّاطِق اِبأسمَه=عَلِي مُبعِد خَطَر هالزَّمَن وشرُورَه لِهَذَا البَارِي أَصدَر حُكمَه هَذَا اليُوم=يِظَل حِيدَر مَدَى الأَزمَان أُسطُورَه