جعفر الصادق من نظر حرگوها للدار=سالت دمِعْته او مُهْجته سرْحت بلفكار تحچي الروايه عن خبر ما منه أفجع=عن حادثة حرْگ او لهَب بالمُهجه تلسع ما بين موْلانه يصلّي لنّه يسمع=صايح يصيح النار شبّت يبن لطهار حين اللي تمّم فرضه والناره طفاها=ناح او تحسّر و احترگ گلبه ابلظاها او شفنه الإمام اتكتّر اوعينه جراها=او روحه الشريفه هامت ابْعالم الأكْدار و اصحابه جوله رادو ايعظموله أجره=گالوله ماهو اجديد إذا الطاغي تجرّه حرْگوها گبل الساعه دار امّك الزهره=إصبر يبو الكاظم مثل جدّك الكرار گال ادري گبلي عالوديعه حرْگوْ الباب=وادري مصاب الزهره أعظم من هلمصاب لاچن بگى منظر أبد عن عيني ما غاب=ميْصير أبد بعده ولا گبله جرى او صار لمّن لهَيب النار شبّ بمْشاهد العين=من حجره لي حجره شفت تجري النساوين ذكّرني هالحال ابْفَرَار اطفال لحْسين=لمّن خيامه اتوجّرت واشتعلت النار كل ما أشوفن نار ترجعلي هالايام=وانظر اگبالي اتراكضت بالدهشه ليْتام لمّن عليها اتْوَجّرَت بالنّار لخْيام=والعسكر التف عالحرم من كل لكتار وحين الرجاله بن سعد حشمّهم ابزود=يرْجالي گومو للخيام الساعه فرهود و عمّاتي ظلت حايره في وجه الجنود=باليمنه تشگف سوط او تتستّر بليسار و أنه حريمي احتارت ابرغم اهْيه ويّاي=واشما يصير امن الهضم يبگون بحْماي چا شنهو حال اللي اطلعوْ للحومه حُفّاي=وحاميهم ابكثر المرض من علتّه انهار