و آنه اصغير گالولي حُسينك مات=ذبحوه العدى ابطف كربلا ظامي أصدّگ عيني لو صدّك كلام الناس=و آنا ابعيني شفت احسين جدّامي ! ما مات الحُسين الناس مشتبهين=و اضعيف العقيده يوگع ابشبهات فكّر بيها لو تستوْعب الفكره=اشلون ايموت گلّي اليحيي الاموات ؟ نعم أدري او أقر " كل من عليها فان "=بيها ايصرح الله ابنص قرآنه او ما يبقى سوى وجه الله ذو الإكرام=و يبقى احسين .. لأن وجه الله سبحانه ! اشعبّالك بعد هوّه الحُسين اشلون ؟=مثلي او مثلك او عنده العمر معدود ؟ إذا ذبحوْا حُسين ابكربلاء الساع=بعد ساعه او نشوفه ابكربلاء ايعود ! إرفع راسك اتشوف اسمه فوگ اللوح=و انزل لن تُربْته في محل السجود او على أچتاف السما تنظر شفق أحمر=يعني ابكل مكان احسين بيه موجود ! و إذا رايد أقرّب معنى هالفكره=أگول احسين حبل الباري الممدود و ألله لا نهايه او لا بدايه ليه=لا نگدر نحيطه , او لا نحد له احدود و إذا صار الحبل من السما للگاع=يعني احسين صار ابهذه " لا محدود " !! لا تشكل علي و اتگولي ذاك اوياه=ضريح البيه سكن و احتضنته الگبه و لا تربة گبر هذه الحوَت لحْسين=لأن احسين مو جسم ابوسط تربه هذه الكعبه گالوا عنها بيت الله=بس مو معناها ربّك ساكن الكعبه ! ربك ما يوَسعه بالوجود امچان=او بس گلب الحسين اللي وسع ربّه و اشلون اتحِد حُسين او ذوله زوّاره=گلب كل واحد اصبح ينبض ابحبّه أقل شي برْبعينه اربعطعش مليون=وكل واحد حُسين اتشاهد ابگلبه غير اللي خدَم غير اللي دلّ اعليه=غير اللي ابطريقه او فجّروا دربه غير اللي نوى ايزوره لچن ما صار=غير الأعلنوْ لزيارته حربه و غير او غير شعدد ليك شعدّي ليك=بعد ظلّت عليك او منك الحسبه إضرب هالعدد ( بخمسطعش شعبان )=و ضيفه ( ابيوم عاشر ) تطلع النسبه ! هالأعداد من زوّاره بس بالگاع=غير العالم العُلوي او مدى الافلاك غير الجن او ما نعرف خفاياهم=غير اللي تزوره امن السما الاملاك و إذا مني تريد احسب وفود احسين=كون او للصُبح أگعد وعِد ويّاك ! او بعد عندي دليل ايأكده القرآن=بس كون الفطين اليفتهم معناه ليش انگول ما مات الحُسين او ليش=نجزم بالحُسين ابكل كتر نلگاه ؟ لأن گلنا الحُسين اصبح وجه ربنا=او وين اتولي وجهك " ثَم وجه الله " ! و إذا وجه الله صار احسين يعني ايصير=إيد الله , او لسانه , او سمعه ويه العين وإذا يبطش حُسين الله اليصير اچفوف !=يعني لو مشى ايصير الله له رجلين !! او تعالى ربنا ما أقصد أجسّم بيه=لأن سبحانه واحد ما يصير اثنين و معاذ الله اقارن خالق ابمخلوق=لا يقبلها عقلي او لا قبلها الدين لچن هذا الحچي للمؤمنين ايصير=فما بالك إذا چان الحچي لحسين ؟ لا تحسب مغالي او تايه الراي=و لا تحسب كلامي من خيالي و إذا جاهل حضرْتك إقرأ او شوف=گبل لا تصدر احكام ابضلالي و اذا ضيّق مجالك ويه الحسين=( ترى ) واسع في فهم معناه مجالي هذه سنة الهادي اشهدت بيه=او من حچي النبي ردّة فعالي لچن خايف أگولك طاها شيْگول=أخاف اتگول رسول الله مغالي ! او خايف اكشف اللي شفته بحسين=و اهد الساني و احچي اشما حِلالي رغم كل اللي گلته بعدي ساكت=ما أگدر اگولك شاللي جالي موالي او شيعي تحسبني إلى الآن=لأن ما تدري إشداير في بالي و إذا احچي ابرواحه خايف اتگول=بعد لا شيعي انت او لا موالي ! وانا ما همني رايك دام انه الصح=و تدريني من اكتب ما أبالي ما ناقص تعلمني العقيده واضح دربي و الآخر گبالي كل واحد كماله اينوله من صوب=و انا ابشعري لبو الاكبر كمالي !